mércores, 28 de marzo de 2012

O INGENIERÍA TRAZOS TAMÉN QUERE O ASCENSO:

As cadetes, na pelexa polo ascenso á liga galega
O vindeiro domingo día 1 de abril será unha xornada de gran importancia para o noso club, xa que o noso equipo cadete feminino (Ingeniería Trazos Boiro Vb.) ten un fronte aberto, pelexar polo ascenso á liga galega cadete. A pesares da extrema xuventude do equipo, as de Emilio Palacio atópanse agora mesmo nas semifinais do torneo que dá dereito ó ascenso e deberá medirse ás noiesas do Fisioterapia Cinesia para disputar a gran final. Boirenses e noiesas xa se viron as caras na fase regular da liga provincial, caendo o último encontro entre ambas de lado do Ingeniería Trazos por un axustado 3-2 na Cachada. O formato do torneo é dunha final a 4 que se celebrará íntegramente no PM de Rianxo. As semifinais xogaranse simultáneamente ás 11:00h e, xa pola tarde (19:00h), poderemos disfrutar do 3º e 4º e, por suposto, da gran final. ¡A por todas rapazas!

FISIOTERAPIA CINESIA NOIA - INGENIERÍA TRAZOS BOIRO VB.
(11:00h, PM de Rianxo)-(Semifinais do torneo de ascenso á liga galega cadete feminina)

CV PONTEVEDRA - MEXILLÓN DE OURO VB. RIANXO
(11:00h, PM de Rianxo)-(Semifinais do torneo de ascenso á liga galega cadete feminina)

PERDEDOR PARTIDO 1 - PERDEDOR PARTIDO 2
(17:00h, PM de Rianxo)-(3º/4ºposto do torneo de ascenso á liga galega cadete feminina)

GAÑADOR PARTIDO 1 - GAÑADOR PARTIDO 2
(19:00h, PM de Rianxo)-(Final do torneo de ascenso á liga galega cadete feminina)


martes, 27 de marzo de 2012

FASE DE ASCENSO Á LIGA FEV 2012:

O Náutico intentará o ascenso preto da casa, ¡sorte!
É ben coñecido por todos o recente triunfo do Náutico Boiro Voleibol, que se proclamou campión por segunda tempada consecutiva da 1ª División nacional tras derrotar ó Universidade de Burgos a domicilio por 0-3. O seguinte reto dos de Emilio palacio será o play-off de ascenso á liga FEV que dende o día de hoxe xa ten sede. A competición celebrarase en San Sadurniño (Ferrol) os días 27, 28 e 29 de abril e reunirá ós 6 mellores equipos españoles da 1ª División: do grupo A acudirán o Náutico Boiro Voleibol (1º clasificado) e o Intasa San Sadurniño (2º); do grupo B os representantes serán os alicantinos do C.V. Santa Pola (1º) e os barceloneses do C.N. Sabadell (2º); do grupo C estarán a AD Voleibol Almendralejo (1º) de Badajoz e o C.V. Melilla (3º) que accede á competición pola renuncia do que foi o 2º clasificado, o CUV Alcorcón. O sistema de competición será de liguiña no que tódolos equipos xogarán entre sí, reservando praza de ascenso para os dous mellores equipos. En nome de toda a familia do Boiro Voleibol desexámoslles ós nosos moita sorte para acadar o obxectivo que non puido ser conseguido a pasada campaña en Cieza (Murcia) e intentaremos acompañalos na experiencia para apoiar a causa. ¡A por eles Náutico!

domingo, 25 de marzo de 2012

RESULTADOS DO SÁBADO 25 DE MARZO:

O SECRETO BOIRO VOLEIBOL 0-3 CV PONTEVEDRA
(13-25, 25-27, 16-25)-(2ª Div. Autonómica feminina)
O Secreto remata 5º na liga autonómica
O noso primeiro equipo feminino despídese desta 2ª Div. Autonómica 2011-2012 cunha derrota ante o 3º clasificado e rematando, a pesares de tódolos contratempos e lesións,  en 5ª posición. Con importantes baixas afrontaban as de Andrés Martínez e Narciso Abalo o choque no que se baixaba o telón da liga regular e non souberon sobrepoñerse a tales circunstancias. Os erros en recepción e ataque condenaban a O Secreto na primeira manga, poñendo en bandexa a vitoria ás pontevedresas. No segundo parcial viuse o mellor xogo das boirenses. Cunha melloría notable na recepción, un servicio que agora si danaba a recepción visitante e un ataque contundente da man de María Triñanes, Ana Bugallo e Rebeca González as boirenses conseguían darlle emoción ó parcial ata o final, no que se deixaron escapar dúas pelotas de set para ledicia das xogadoras do CV Pontevedra. Neste momento a moral das nosas sufriu un importante revés. Desde o comezo do terceiro as visitantes tomaron a iniciativa dispoñendo de ata 10 puntos de vantaxe no luminoso. Por O Secreto Boiro Voleibol xogaron: Sara Bugallo, Rebeca González, María Triñanes, Ana Bugallo, Elena García, Ángela Fernández e Sheila Outeiral (líbero). Como reservas estaban Carla Castro, Andrea Barreiro e Luisa Ferreirós.

UNIVERSIDAD DE BURGOS 0-3 NÁUTICO BOIRO VOLEIBOL
(18-25, 22-25, 14-25)-(1ª Div. Nacional masculina)
O Náutico revalida o título da 1ª Div. Nacional. Parabéns
E por fin chegou o gran día. Na mañá do sábado partía a expedición boirense cara a terras burgalesas coa intención de traer para Boiro o título de campións da 1ª División nacional por segundo ano consecutivo. As expectativas creadas entorno ós homes que dirixe Emilio Palacio cumplíronse dende o primeiro punto do encontro, no que os boirenses mostraron a súa cara máis alegre e concentrada sendo coñecedores da trascendencia do choque. Arrancaba o partido cunha xeira extraordinaria de servicios dos nosos por parte de Iván Souto e Cristóbal Álvarez que colocaban ó Náutico cunha renda amplísima (1-12) permitindo sacudir a presión dos momentos iniciais. Malia que Universidade de Burgos mellorou a partires do ecuador do set a renda xa era demasiada e permitíalles ós boirenses situar a primeira pedra do alirón. No segundo set os locais apretaron. Presionando co seu altísimo bloqueo e cun saque que incomodaba a recepción barbanzana levaba a emoción a un final de set que se decidiría con dúas accións de bloqueo-defensa por parte dos nosos. No terceiro set os nosos afinaron a recepción e fixeron que os locais perderan a motivación pola vitoria, pechando deste xeito o encontro e baixando o telón da liga regular de 1ª División Nacional masculina co Náutico Boiro Voleibol no máis alto da táboa cllasificatoria por segundo ano consecutivo. Polo Náutico Boiro Voleibol xogaron: Iván Souto, Narciso Abalo, Jesús Vázquez, Antón Pérez, Cristóbal Álvarez, Emilio Palacio e Adrián Alves (líbero). Tamén xogaron Rubén Taibo, Xavier Sarille, Manuel Pérez, Miguel Vázquez e Gustavo Romero.

mércores, 21 de marzo de 2012

XENTE DO BOIRO VOLEIBOL, GUSTAVO ROMERO:

Gustavo Romero: “Hai equipos e hai grupos de xente xogando ao volei. Nós somos dos primeiros”

Gus, un dos piares do noso proxecto
Gus xoga ao volei a ritmo de funky, e celebra as vitorias en do maior coa charanga. Non me atrevín a lle preguntar a quen quería máis, se ao saxo ou ao balón, porque hai veces en que se pode ter todo.  Non lle importa implicarse, e por iso tamén participa da Directiva do Club, onde todas as mans son benvidas: “A Xunta Directiva non quere aplausos, pero si que se respecte ese traballo. Antes practicamente era todo por amor de Andrés, pero agora deuselle máis estrutura, con Antón, Emilio, Bugallo, Chicho... Trabállase por dar a coñecer e dignificar o volei”. E estase cumprindo, a xente en Boiro fala de voleibol.
E aínda que a veteranía e os múltiples frentes de implicación do capitán do Náutico ameazan con apartalo da pista, nunca do Club, onde desfruta do xogo, do ambiente e dun proxecto social e deportivo cada vez máis forte.

-(Charo) ¿Ten relación á musica e o deporte?
 -(Gus) A coordinación é moi importante en ambas, tamén a capacidade de moverse en equipo e de controlar os egos, que cada un é do seu pai e da sua nai; e tanto nun grupo como nun equipo é importantísimo saber xestionalos e acoplarse. Especialmente en voleibol, que ou xogas en equipo ou nada.

-¿Que pasa na pista, que te transformas?
-Si, non sei se é por compensar a técnica que perdín, pero hai xente que non me recoñece, porque eu son afable e tranquilo na rúa, pero en pista... encéndeste! Somos seis, e os seis temos que ir a por todas. Concéntrome, enaxénome. E soltas enerxía por un tubo. En ataque: agresivo. En defensa: agresivo. Hai que pegarlle con ganas, con raiba, con atitude. Sen contemplacións.
Pero tamén hai que ser xeneroso, se hai un balón dividido vas, imos todos, e o primeiro que chegue chegou. Iso é compañeirismo. Eu inténtoo, e en xeral todos: Chicho, Pas... están aí ao que cae, e iso fai que o equipo funcione ben, é unha dinámica contaxiosa.

“En ataque agresivo, en defensa agresivo. Sen contemplacións”

-¿Que implica ser capitán?
-É imprimir un carácter e organizar un pouco todo. Dígollo sempre a eles, cando chegamos a un partido e empezamos a quentar, hai unha concentración, un silencio, todos facendo os mesmos exercicios... E se no outro lado ves que cada un vai ao seu, dis: vés, isto é un equipo e iso é un grupo de xente que ven xogar ao volei. E vese no campo e nos resultados. Os preámbulos, os adestramentos e os pospartidos -todos estiramos xuntos-, todo fai un equipo.

-¿Sintes responsabilidade con respecto á canteira?
-Si, moita, pero estou tranquilo. A dinámica é moi boa e os que chegan rapidamente se acoplan a esa dinámica. A xente non é que sexa boa nin mala, simplemente adáptase ao ambiente. E se o ambiente é bo, pois perfecto.
No campo axúdase a recoller, a montan a rede, inténtase que non haxa desplantes con ninguén... Todo iso van facéndoo os novos ao ver que o fan os maiores. De feito a función do equipo senior é ser a punta de lanza para motivar aos nenos. Se ven que a grada se enche, se se viaxa... Iso motívaos para seguir traballando.

-¿Ti tamén ves da canteira. Levas no volei desde a escola, non é?
-Empecei con oito ou nove anos, e estiven até xuvenís, porque en Cabo non había equipo senior. E estiven dous anos xogando ao futbol, que era o que había. Depois fun outros dous anos a Rianxo, a xogar ao volei.

-¿Que tal alí?
 -Moi ben, de feito nos últimos partidos xa era o capitán do equipo. Despois foi cando marchei para Albacete, senón igual me pasaba como a Narci, que estivo anos alí e veu o ano pasado para Boiro.

-¿E foi dificil convencerche para a volta?
-Que va! Cheguei e íame apuntar ao ximnasio ou á piscina. Algo teño que facer, que sen deporte non podo estar, bótoo en falta como comer. E xusto o día antes chamáronme. E que vou comparar, estar pagando por facer algo eu só co que me gusta a min a xente...? Tíveno claro: Boto unha man e a ver que pasa. De feito esperaba que Emilio me deixara no equipo de Segunda, despois de oito anos...  Pero non, curiosamente confiou en min. Ou veu que lle metín moitas ganas, non sei.

-Viviches dúas etapas moi distintas dentro do club, os teus comezos e a volta.
-Si, agora coñezo mellor todo o que hai detrás dun Club. O que custa que veña un árbitro, a equipación, as viaxes... Aprendes a valorar máis todo. Cando cheguei de volta ao Club propuxen “porque non facemos un evento na rúa peonil para xuntar socios?” e xa me dixeron “boa idea, porque non te achegas a unha reunión da directiva?”. Alá fun e xa Bugallo dixo: “Bueno, temos un directivo máis” e apuntoume na acta. Despois, a nivel deportivo a volta á pista foi dura, incluso cambiaron os balóns! Cando o deixei aínda non existía a figura do líbero, por exemplo. Entón atopeime con outras normas, con outros balóns, con outra xente. Pero penso que me adaptei ben.

A volta á pista foi dura, incluso cambiaron os balóns!

-Sodes un dos equipos de volei que máis siareiras e siareiros movedes en Primeira.
-Si, o que hai aquí é dificil atopalo, incluso en campos de Superliga.  A Cachada está moi ben situada e iso tamén axuda. E se se fan ben as cousas a xente engánchase. Se un día traes un regaliño, outro dia traes a charanga... Mira, hai unhas señoras que traballaban comigo e ao principio dicíanme “moi bem esta fin de semana funvos ver e xenial”. Pero agora, de vez en cando xa me espetan “bueno, esta semana... xogastedes regular”; xa empezan a ser críticos! E iso é fantástico. Empeza a haber cultura de voleibol.

-E ti, ¿que lles dis?
-(risas) Bueno, “pois tes razón esta semana...”

-¿Como levas a veteranía?
-A veterania lévoa ben, o que me pesa son os oito anos de parón. Estou loitando por recuperar técnica, e bótolle ganas para compensalo un pouco, pero nunca se está conforme. En saque xa estou ben, en recepción regular...

-¿Que perspectiva tes a medio prazo?
-A medio prazo acabar esta temporada, ir á fase e facer un bo papel. E despois seguir co Club, axudando, pero non sei eu se seguir outra tempada máis. Pero bueno, agora prefiro rematar a tempada e despois falar con calma.
Tamén tiven as miñas tentacións por coller un equipo para adestrar. Pero gústame implicarme ao 100%, e para adestrar un equipo non podes faltar, es o guía; así que tería que pensalo moito. Teño vida privada! (risas) E non teño moito tempo, toco en Phantom Club, en Supersandwich e son o presidente da charanga “Os trompos das nicras”. 
Charo López

ENCONTROS DO SÁBADO 24 DE MARZO:

XORNADA DE DEPORTE ESCOLAR
(A partires das 10:00h, Noia)-(Benxamín, alevín e infantil)

O SECRETO BOIRO VOLEIBOL - CV PONTEVEDRA
(18:00h, A Cachada)-(2ª Div. Autonómica feminina)

UNIVERSIDAD DE BURGOS - NÁUTICO BOIRO VOLEIBOL
(20:15, Pab. Universitario)-(1ª Div. Nacional masculina)

sábado, 17 de marzo de 2012

RESULTADOS DO 17-18 DE MARZO

NARÓN VOLEA 0-3 REDESYL BOIRO VOLEIBOL
(25-27, 22-25, 16-25)-(2ª Div. Autonómica masculina)
O Redesyl remata 3º na competición autonómica
Desplazamento a terras ferrolanas do equipo filial nun encontro no que non se xogaban máis que a dignidade dos dous puntos da vitoria. Con este condicionante comezou o equipo a contenda coa habitual baixa intensidade neste treito final da 2ª División. Desta situación aproveitáronse os de Narón poñendo en moitos apretos ó Redesyl no final do primeiro parcial. Co transcorrer dos puntos semellaba que os nosos ían afinando o seu xogo, cometendo menos erros non forzados e chegando con maior vantaxe ós finais de set. Con esta vitoria por 0-3 os de Felipe García despídense da tempada cun meritorio 3º posto, que os deixa ás portas da fase de ascenso. Polo Redesyl Boiro Voleibol xogaron: Daniel García, Roberto Rodríguez, Xavier Sarille, Diego Romero, Pablo Suárez, Martín Herrera e Adrián Armental (líbero). Tamén xogaron Diego Alcalde, Andrés Martínez e Ignaco Cibeira.

NÁUTICO BOIRO VOLEIBOL 3-0 INTASA SAN SADURNIÑO
(25-20, 25-22, 25-17)-(1ª Div. Nacional masculina)
Ambiente de gala na Cachada, gracias a todos. Vai por vós
Trascendental triunfo o que logrou na tarde de sábado o noso primeiro equipo masculino para colocarse líder da 1ª División Nacional nun ateigado polideportivo da Cachada. Moitos eran os siareiros (autoridades do Concello incluídas) que querían apoiar ó seu equipo nun histórico encontro para a entidade boirense que mantén vivas as esperanzas de revalidar a coroa da categoría. O encontro comezaba cos de Emilio Palacio moi concentrados. Un gran Iván Souto ó servicio obrigaba ó preparador visitante a solicitar o primeiro tempo morto do partido. A renda conseguida nos intres iniciais era suficiente para pechar favorablemente a primeira manga cun alto nivel dos nosos no complexo bloqueo-defensa. No segundo parcial o Intasa subiu o nivel para intentar defender a súa situación na táboa. Chegados ó ecuador do set os de Eloy Mahía permanecían 3 puntos por diante no luminoso baseándose nun efectivo bloqueo. Tras momentos de dúbida os locais recuperaron a súa mellor versión e conxuráronse para non deixar escapar a manga. A destacada aportación ofensiva de Cristóbal Álvarez, Emilio Palacio e Narciso Abalo facía posible a remontada e situarse cun 2-0 no tanteador xeral. Esta situación danou a moral dos visitantes que non conseguiron modificar a traxectoria do encontro para ledicia do Náutico. Vistoso parcial para rematar o encontro o que protagonizaron os nosos con combinacións fluídas en ataque e moito acerto en defensa. Polo Náutico Boiro Voleibol xogaron: Iván Souto, Narciso Abalo, Jesús Vázquez, Antón Pérez, Cristóbal Álvarez, Emilio Palacio e Adrián Alves (líbero). Como reservas estaban Rubén Taibo, Daniel Agra, Gustavo Romero, Manuel Pérez e Miguel Vázquez.


VOLEIBOL DUMBRÍA 3-1 REYCA BOIRO VOLEIBOL
(18-25, 25-15, 25-17, 25-19)-(Liga galega cadete masculina)
Derrota do Reyca na despedida da liga galega cadete
Derrota do equipo cadete masculino nesta mañá de domingo no seu desprazamento á cancha do Voleibol Dumbría. A intensidade de xogo dos boirenses non podía igualar á dos xogadores locais debido a que estes se xogaban a clasificación para a fase final do campionato galego. O encontro comezaba cos boirenses concentrados e atinados na construcción do xogo. A través dun ataque eficaz da man do receptor Xian Pérez os boirenses de contado se disparaban no luminoso para chegar á recta final da manga con vantaxe suficiente como para pechala sen maiores problemas. A partires de aquí o Reyca desapareciu da pista. Os continuos erros poñían en bandexa amplas vantaxes para os locais que os nosos xa non poderían remontar. Polo Reyca Boiro Voleibol xogaron: Adrián Gatbache, Raúl Lojo, Óscar Refojo, Dani Gey, Xián Pérez, Fran Dieste e Lois Vázquez (líbero). Tamén xogou Rubén Martínez.


XAV CAMBADOS B 1-3 INGENIERÍA TRAZOS BOIRO VB
(17-25, 25-19, 12-25, 21-25)-(Liguiña de ascenso á liga galega)
As cadetes logran unha importante vitoria en Cambados
Vitoria do equipo cadete feminino que dirixe Emilio Palacio no encontro de volta ante as cambadesas. A pesares de non comezar moi atinadas no encontro, as nosas conseguían anotarse o primeiro parcial polo que o triunfo total no global xa estaba no peto baseándose nos servicios de Ana Bugallo e Enma Ordóñez. No segundo xogo o Ingeniería Trazos baixou unha marcha polo que as cambadesas conseguirían unha vantaxe de 8 puntos. No tramo final, o saque de Lea Gatbache reducá diferencias mais non era abondo para facer dubidar ás locais . A partires de aquí as nosas reaccionaron. Ordeadas en defensa e cun ataque máis que efectivo levaríanse as dúas  mangas seguintes para pechar o encontro cun 1-3 favorable. Polo Ingeniería Trazos Boiro Voleibol xogaron: Sara Bugallo, Enma Ordóñez, Alejandra Galbán, Antía Sampedro, Ana Bugallo, Melissa Novoa e Sheila Outeiral (líbero). Tamén xogaron Claudia Pinaque, Sara Lojo e Lea Gatbache.

XAV CAMBADOS 2-3 O SECRETO BOIRO VOLEIBOL
(21-25, 25-27, 25-20, 25-13, 9-15)-(2ª Div. Autonómica feminina)
As irmás Triñanes tiran de O Secreto
Malia viaxar a Cambados plagadas de baixas o primeiro equipo feminino soubo plantar cara e traerse para Boiro os dous puntos dunha traballadísima vitoria. Gran servicio e sobre todo brilante construcción do ataque a que desarrollou O Secreto nas dúas primeiras mangas baseándose nunha excelente recepción e no eficaz ataque das súas receptoras María Triñanes e Ana Bugallo, que anotaban cada balón que tocaban. Co tanteador favorable de 0-2 as nosas foron víctimas da relaxación. As locais melloraron o seu saque e ataque para facer dubidar a defensa do cadro barbanzano. Esta situación tiña un desenlace de igualada a sets no luminoso e levaba o encontro ó tie-break. Neste, o servicio das irmás Triñanes mostrábanlle ás nosas o camiño da vitoria, poñendo unha terra de por medio que as cambadesas xa non serían capaces de recuperar. Por O Secreto Boiro Voleibol xogaron: Ángela Triñanes, Ana Bugallo, Carla Castro, Sheila Outeiral, María Triñanes e Sara Bugallo.

mércores, 14 de marzo de 2012

PARTIDOS DO 17-18 DE MARZO:

SÁBADO 17:

NARÓN VOLEA - REDESYL BOIRO VOLEIBOL
(12:00h, A Gándara)-(2ª Div. Autonómica masculina)

NÁUTICO BOIRO VOLEIBOL - INTASA SAN SADURNIÑO
(18:00h, A Cachada)-(1ª Div. Nacional masculina)

DOMINGO 18:

VOLEIBOL DUMBRÍA - REYCA BOIRO VOLEIBOL
(12:30h, PM Dumbría)-(Liga galega cadete masculina)

XAV CAMBADOS B - INGENIERÍA TRAZOS BOIRO VB
(17:00h, O Pombal)-(Liguiña de ascenso á liga galega)

XAV CAMBADOS - O SECRETO BOIRO VOLEIBOL
(19:00h, O Pombal)-(2ª Div. Autonómica feminina)

sábado, 10 de marzo de 2012

RESULTADOS DO 10 DE MARZO:

TRILLIZOS BOIRO VOLEIBOL 2-3 ZALAETA
(25-21, 25-22, 23-25, 18-25, 11-15)-(Liga galega xuvenil masculina)
Gran aportación ofensiva de Fran Dieste
Boas sensacións as que mostraba na mañá do sábado o equipo xuvenil masculino a pesares da axustadísima derrota por 2-3. Moitas e importantes eran as baixas coas que o Trillizos afrontaba este choque ante o Zalaeta pero os rapaces de Adrián Alves souberon estar á altura das circunstancias e plantar cara en todo o momento malia a ausencia dos seus dous colocadores habituais. Destacadísima aportación en tarefas ofensivas do oposto cadete Fran Dieste, que en todo momento danaba o entramado defensivo dos coruñeses impedíndolles atopar situacións claras de contraataque. A regularidade dos coruñeses en momentos decisivos do tie-break desequilibraba a balanza ó seu favor e desestabilizaba a moral do xovencísimo equipo boirense. Polo Trillizos Boiro Voleibol xogaron: Adrián Gatbache, Fran Dieste, Óscar Refojo, Miguel Lorenzo, Xian Pérez, Martín Herrera e Lois Vázquez (líbero). Tamén xogou Dani Gey.

INGENIERÍA TRAZOS BOIRO VOLEIBOL 3-0 XAV CAMBADOS B
(25-7, 25-18, 25-15)-(Liguiña de ascenso á liga galega cadete feminina)
Incontestable triunfo do Ingeniería Trazos ante o XAV Cambados
Da mellor maneira posible comezan as rapazas que dirixe Emilio Palacio esta liguiña de ascenso á liga galega. A efectividade das irmás Bugallo ó servicio marcaría o desenlace do primeiro set. Primeiro Ana e despois Sara desequilibraron este xogo ata tal punto que as nosas chegaron a atoparse cun 21-1 favorable. No segundo parcial as cambadesas subiron o seu nivel. Mantivéronse por diante no luminoso ata mediada a manga, momento no que o Ingeniería Trazos atopou de novo a vía axeitada para vlver a anotarse o xogo e colocarse cun cómodo 2-0. No terceiro, o preparador local daba entrada ás xogadoras con menos minutos e o equipo non se resentía en absoluto. Deste xeito, a vitoria queda en Boiro deixando con ela unhas moi boas sensacións de cara a vindeiros convites. Polo Ingeniería Trazos Boiro Voleibol xogaron: Sara Bugallo, Emma Ordóñez, Melissa Novoa, Alejandra Galbán, Antía Sampedro, Ana Bugallo e Sheila Outeiral (líbero). Tamén xogaron Claudia Pinaque, Isabel Gómez e Sara lojo.

REDESYL BOIRO VOLEIBOL 3-2 FISIOTERAPIA CINESIA NOIA
(Agardando parciais)-(2ª Div. Autonómica masculina)
Vitoria boirense no primeiro derbi do sábado
Axustada vitoria do equipo filial masculino no primeiro dos derbis rexionais que terían lugar na tarde de sábado. Os de Felipe García doblegaron ós noieses, non sen sufrimento, e mostrando un xogo de altibaixos ó longo de todo o partido. A falta de regularidade do Redesyl non lles permitía enlazar moitos minutos de bo xogo consecutivos, e os erros non forzados en ataque alimentaban as esperanzas dos noieses que, cunha gran actitude defensiva, mantiveron en vilo ós boirenses ata o último momento. A situación en terra de ninguén na que se atopan os boirenses na táboa clasificatoria impídelles xogar os encontros coa necesidade axeitada e, dende hai za unhas semanas, non son capaces de mostrar a súa mellor versión. A pesares de todo, os dous puntos da vitoria quedaron na Cachada para ledicia dos nosos. Polo Redesyl Boiro Voleibol xogaron: Daniel García, Ignacio Cibeira, Martín Herrera, Pablo Suárez, Diego Romero, Juan "Mande" e Adrián Armental (líbero). Tamén xogaron Andrés Martínez, Xavier Sarille, Juan Lorenzo e Roberto Rodríguez.

O SECRETO BOIRO VB. 3-1 FISIOCHEBEN SAN SADURNIÑO
(24-26, 25-22, 25-12, 25-22)-(2ª Div. Autonómica feminina)
As rapazas doblegan ás ferrolanas
Vitoria do primeiro equipo feminino ante un complicado rival como é o San Sadurniño. Dende o comezo as locais dominaban o encontro, situándose cunha renda favorable de 8 puntos. Os erros non forzados sembraron a desconfianza entre as nosas no tramo final do xogo e o Fisiocheben aproveitou a situación para anotarse o primeiro. Na segunda manga as sensacións iniciais volvían. Comandadas por María Triñanes en ataque conseguiron igualar o tanteador xeral. O terceiro set estivo totalmente condicionado polo excelente servicio de Ángela Triñanes que conseguiu ampliar a distancia no luminoso coas ferrolanas ata chegar a estar cun 21-7. As boas sensacións prolongábanse ó longo de todo o cuarto xogo. Boa actuación defensiva de Elena García e de Rebeca González en facetas ofensivas. Por O Secreto Boiro Voleibol xogaron: Ángela Triñanes, Elena García, María Triñanes, Rebeca González, Ana Bugallo, Ángela Fernández e Sheila Outeiral e Carla Castro (líberos). Tamén xogaron Sara Bugallo, Evelyn Urrutia e Andrea Barreiro.


MEX. DE OURO VB. RIANXO 1-3 NÁUTICO BOIRO VOLEIBOL
(25-23, 18-25, 12-25, 15-25)-(1ª Div. Nacional masculina)
Espectacular actuación de Iván Souto ó servicio
Vitoria do primeiro equipo masculino do Boiro Voleibol neste derbi rexional da 1ª división nacional demostrando o bo estado de forma que están asinando neste tramo final de liga os de Emilio Palacio. Comezaba o encontro co Náutico moi concentrado. Baseándose nun gran servicio de contado se disparaban no luminoso poñendo terra de por medio cos rianxeiros. Chegados ó ecuador do xogo un baixón no nivel do ataque boirense daba vida ós locais que igualaban o tanteador e se anotaban o primeiro nun intrépido desenlace. A partires de aquí os boirenses non deron opción ó Mexillón de Ouro. O potente servicio do colocador Iván Souto e do receptor Cristóbal Álvarez marcaba as diferencias no municipal de Rianxo. O nivel en bloqueo-defensa mellorou exponencialmente, destacando nesta faceta o central Antón Pérez e o receptor Emilio Palacio que poñían en pé ós siareiros boirenses desprazados ata Rianxo con espectaculares accións en bloqueo. Con esta vitoria, os boirenses clasifícanse por segundo ano consecutivo para a fase de ascenso á liga FEV. Noraboa e traballo duro para preparar tan competitiva cita. Polo Náutico Boiro Voleibol xogaron: Iván Souto, Narciso Abalo, Jesús Vázquez, Antón Pérez, Cristóbal Álvarez, Emilio Palacio e Adrián Alves (líbero). Tamén xogaron Rubén Taibo, Daniel Agra, Manuel Pérez, Xavier Sarille e Miguel Vázquez.

mércores, 7 de marzo de 2012

XORNADA DO 10 DE MARZO:

TRILLIZOS BOIRO VOLEIBOL - ZALAETA
(11:00h, A Cachada)-(Liga galega xuvenil masculina)

INGENIERÍA TRAZOS BOIRO VOLEIBOL - XAV CAMBADOS B
(11:00h, A Cachada)-(Liguiña de ascenso á liga galega cadete feminina)

REDESYL BOIRO VOLEIBOL - FISIOTERAPIA CINESIA NOIA
(16:00h, A Cachada)-(2ª Div. Autonómica masculina)

O SECRETO BOIRO VB. - FISIOCHEBEN SAN SADURNIÑO
(18:00h, A Cachada)-(2ª Div. Autonómica feminina)

MEX. DE OURO VB. RIANXO - NÁUTICO BOIRO VOLEIBOL
(19:00h, PM de Rianxo)-(1ª Div. Nacional masculina)

martes, 6 de marzo de 2012

4 BOIRENSES NA PELEXA POLO CPTO. DE ESPAÑA UNIVERSITARIO:

Jesús, Narciso, Iván e Antón viaxan a Madrid coa USC
O colocador Iván Souto, o oposto Narciso Abalo e os centrais Jesús Vázquez e Antón Pérez, xogadores do Náutico Boiro Voleibol que milita na 1ª división española, disputarán estes días o intersector que os pode clasificar para xogar o Campionato de España Universitario 2012 en representación da USC (Universidade de Santiago de Compostela). A USC clasificouse para este torneo tras doblegar no campionato galego celebrado no mes de febreiro no INEF Galicia (Oleiros) ás universidades de A Coruña e Ourense. Nestes intres  os catro viaxan, co resto dos seus compañeiros, rumbo a Madrid para plantar cara a rivais tan fortes como a priori se antollan os murcianos da UCAM. Moita sorte rapaces!

sábado, 3 de marzo de 2012

RESULTADOS DO SÁBADO 3 DE MARZO:

INGENIERÍA TRAZOS BOIRO VB 3-1 IES AMES B
(25-8, 25-22, 22-25, 25-10)-(Liga provincial cadete feminina)
As cadetes queren competir cos mellores equipos de Galicia
Nova vitoria do Ingeniería Trazos Boiro Vb nesta liga provincial cadete feminina qie baixou o telón no día de onte. Tras esta 14ª xornada as de Emilio Palacio clasifícanse para a liguiña de ascenso á liga galega que comezará a vindeira semana e para a que as boirenses están máis que capacitadas. Bo xogo o mostrado polas boirenses no que destacou o servicio e a melloría na defensa en case que todo o encontro. A maior tranquilidade e orde en momentos decisivos facía que as nosas sempre estivesen en situacións favorables no luminoso e poder así, xogar con máis tranquilidade e soltura. Polo Ingeniería Trazos Boiro Voleibol xogaron: Emma Ordóñez, Ana Bugallo, Sara Bugallo, Melissa Novoa, Alejandra Galbán, Antía Sampedro e Sheila Outeiral (líbero). Tamén xogaron Claudia Pinaque, Sara Lojo, Isabel Gómez e Ángela Alves.

REDESYL BOIRO VOLEIBOL 3-2 CV PONTEVEDRA
(26-24, 23-25, 24-26, 27-25, 19-17)-(2ª Div. Autonómica masculina)
O Redesyl gaña na Cachada ó CV Pontevedra
Vitoria pola mínima do  Redesyl ante o CV Pontevedra nesta 16ª xornada da 2ª división autonómica. Pódese clasificar como un encontro inusual posto que ámbolos dous equipos mostraban dúas caras moi diferentes en canto ó nivel de xogo desenvolvido na Cachada. A situación para os de Felipe García non é doada xa que se atopan en terra de ninguén na táboa clasificatoria e xa non adoitan intensificar os encontros como se facía no pasado cercano do equipo. A suma de todas as características anteriormente citadas non podían ter outro desenlace que non fose un axustado tie-break no que o equipo gañador foi o que soubo manter a tenacidade e cometer menos erros que o rival. Polo Redesyl Boiro Voleibol xogaron: Dani García, Roberto Rodríguez, Martín Herrera, Pablo Suárez, Xavier Sarille, Alén García e Adrián Armental (líbero). Tamén xogaron Andrés Martínez, Ignacio Cibeira, Diego Romero, Juan Mande e o xuvenil Miguel Lorenzo

IES AMES 3-0 REYCA BOIRO VOLEIBOL
(25-15, 25-23, 25-22)-(Liga galega cadete masculina)
Un pracer ver xogar a Darío cos cadetes, CRACK
Con esta derrota en Ames por 3-0 o equipo cadete masculino despídese das súas opcións de participar na fase final do campionato galego onde se decidirán os equipos que representarán á nosa comunidade no campionato nacional. Os boirenses acudían a esta importante cita con 3 baixas no seu equipo inicial. Á xa coñecida fichaxe do colocador Ismael Martínez polo Club Vigo Voleibol sumábanse as do central Raúl Lojo e a do receptor Lois Vázquez. O encontro comezaba cos boirenses nunha situación de desconcerto froito do profundo cambio no sistema. Numerosos erros producto destas circunstancias facilitaban a vitoria local con certa comodidade. No segundo set o Reyca melloraba. Cunha meritoria actuación do xogador alevín Darío Outeiral que actuou de colocador na tarde de sábado, os boirenses achegábanse no luminoso gracias á actuación en ataque de Xian Pérez e Fran Dieste. Dous erros en servicio poñian en bandexa o triunfo parcial ós rapaces de Ames. O terceiro era un calco do anterior. Igualdade ata o tramo final de set onde os boirenses cometendo un par de erros non podían pechar a manga cun resultado favorable. Polo Reyca Boiro Voleibol xogaron: Darío Outeiral, Fran Dieste, Xian Pérez, Adrián Gatbache, Dani Gey e Óscar Refojo. Tamén xogou Rubén Martínez.

CV BRUXAS 3-2 O SECRETO BOIRO VOLEIBOL
(25-14, 27-25, 23-25, 23-25, 15-6)-(2ª Div. Autonómica feminina)
Gran actuación de Rebe en tarefas defensivas
Axustada a derrota que sufreu en Ames o noso primeiro equipo feminino nun encontro de altibaixos de nivel dun e outro conxunto e no que se anotou o triunfo o equipo que menos erros cometeu no tie-break. A altura en bloqueo e orde defensiva do CV Bruxas condicionaba o xogo de O Secreto nas dúas primeiras mangas que caían en saco local tras momentos de mal xogo por parte das boirenses. Desde este momento e encabezadas por unha gran María Triñanes en faceta ofensiva e unha inspiradísima Rebeca González no apartado defensivo as nosas atopaban a maneira de facer dano ó entramado defensivo local, que non era doutro xeito que variando a intensidade dos golpeos e intercalando ataques duros con fintas ás que unha e outra vez non chegaba a segunda liña amiense. Chegados ó tie-break estaba claro que se trataría dunha manga paixonal e que a balanza se decantaría polos erros non forzados dun e doutro equipo. Así as cousas as boirenses non apareceron en ningún momento: erros en recepción, en saque, en ataque e no resto das vertentes do xogo facían que os dous puntos da vitoria quedasen no peto das rapazas que dirixe Quico Bouza. Por O Secreto Boiro Voleibol xogaron: Sheila Outeiral, Elena García, Katy Sampedro, Ángela Fernández, María Triñanes, Carla Castro e Rebeca González (líbero). Tamén xogou Andrea Barreiro